Nýjasta nýtt - 25.01.2012

Upplýsingatæknifyrirtækið Advania hélt síðbúna nýársgleði um síðustu helgi. Í aðdraganda gleðinnar var efnt til samkeppni meðal viðskiptavina og samstarfsaðila fyrirtækisins og NÖRD ÁRSINS valinn. Alls bárust um 630 tilnefningar frá 10 þúsund manns og þar af fengu 20 manns fleiri en fimm atkvæði. Dómnefnd fór síðan yfir tilnefningar og valdi NÖRD ÁRSINS með hliðsjón af þeim.

Að þessu sinni urðu tveir nördar fyrir valinu: Gunnar Grímsson og Róbert Bjarnason. Þeir fengu að launum veglegan bikar og flugmiða fyrir tvo til útlanda með WOW air. „Þeir félagar hljóta verðlaunin í ár annars vegar út af mögnuðu ævistarfi í upplýsingatækni sem hefur spannað yfir tvo áratugi og hins vegar vegna framsækinna frumkvöðlastarfa við rafræn lýðræðisverkefni undanfarin þrjú ár,“ segir meðal annars í umsögn dómnefndar. Advania er frumkvöðull og styrktaraðili þessara verðlauna.

Dómnefnd skipuðu Ari Kristinn Jónsson rektor Háskólans í Reykjavík, Arnheiður Guðmundsdóttir Skýrslutæknifélagi Íslands, Frosti Sigurjónsson fjárfestir, Guðjón Már Guðjónsson hjá Medizza, Helga Waage hjá Mobilitus, Hilmar Veigar Pétursson forstjóri CCP, Hjálmar Snær Gíslason forstjóri DataMarket og NÖRD ÁRSINS 2010, Sigríður Þórðardóttir viðskiptagreindarstjórnandi hjá Advania, Sigrún Eva Ármannsdóttir forstömaður veflausna Advania, Stefán Baxter netlausnastjórnandi hjá VÍS og Vilhjálmur Þorsteinsson fjárfestir.

NOKKUR ORÐ UM NÖRDA ÁRSINS

Gunnar Grímsson hefur verið virkur þátttakandi í upplýsingatækni síðan 1995. Hann var fyrsti vefstjóri Miðheima (centrum.is), sem var fyrsta almenna internetþjónustufyrirtæki landsins. Einnig var hann meðstofnandi this.is og IO Inter Organ og stjórnaði fyrstu alþjóða sýndarveruleikaráðstefnunni á Íslandi: Avatars98. Gunnar óf, skrifaði og kenndi veftækni frá 1995 til 2008. Hefur meðal annars séð um vefmál Háskóla Íslands, Listaháskólans, Listahátíðar, Icelandair og Alþingis. 

Róbert Bjarnason hefur verið virkur frumkvöðull frá 12 ára aldri, þegar hann seldi sitt fyrsta forrit. Hann stofnaði sitt fyrsta fyrirtæki 13 ára og setti síðan Miðheima á stofn árið 1993. Róbert stofnaði seinna centrum.dk í Danmörku, sem var þá annað af tveimur netþjónustufyrirtækjum landsins. Hann var um árabil frumkvöðull í leikjabransanum og vann meðal annars bresku BAFTA-verðlaunin tvö ár í röð fyrir farsímaleiki. Milljónir manna um víða veröld hafa spilað leiki á vegum Róberts. 

Saman hafa Gunnar og Róbert einbeitt sér að rafrænum lýðræðisverkefnum frá árinu 2008. Þar má nefna grasrótarverkefnið Skuggaþing, Betri Reykjavík sem er samstarfsverkefni með Reykjavíkurborg, netgáttina Your Priorities sem inniheldur lýðræðisvefi fyrir öll lönd heimsins, Betra Ísland sem opnaði á 2011 og sjálfseignarstofnunina Íbúa ses sem hefur lýðræðisstyrkingu að markmiði. Þeir unnu jafnframt alþjóðlegu lýðræðisverðlaunin World eDemocracy Award 2011.

ATKVÆÐAHÁIR NÖRDAR

Baldur Gíslason
Sigurvegari hakkkeppni HR
Bílatölvu- og túrbínufíkill

Benedikt Sveinsson
Radíóamatör og Cisco-kjáni
RC-þyrludjönkari hjá CCP

Björk Guðmundsdóttir
Spjaldtölvufrömuður, tónskáld
"Biofelia" er nördatónverk 

Dr. Ýmir Vigfússon
Lektor í tölvunarfræði við HR
Hakkarakennari

Friðrik Skúlason
Nörd aldarinnar
FRISK

Frosti Bergsson
Lífstíðarnörd
Opin kerfi

Georg Lúðvíksson
Meganörd
Meniga

Guðjón Ármannsson
lögfræðingur á Lex
lifandi gagnagrunnur...

Helga Waage og Þórarinn Ásgeir Stefánsson
Mobilitus
Raðfrumkvöðlar

Hilmar Veigar Pétursson
Dev-nörd og forstjóri
CCP

Inga María Guðmundsdóttir
Óvænti milljónamæringurinn
Dressupgames.com. 

Jens Valur Ólason
Elur upp nördakynslóð
Tölvu- og tæknideild HR

Már Örlygsson
Vefforritari 
Pælari hjá Hugsmiðjunni

Ragnar Þór Pétursson
Kennari við Norðlingaskóla í Reykjavík
Brautryðjandi í UT-kennslu

Smári McCarthy
Virkur þátttakandi í Wikileaks
Félag um stafrænt frelsi á Íslandi

Sverrir Pétursson
Sjávarútvegsbóndi á Vestfjörðum
Hannaði prjónavef á frívöktum

Tómas Ponzi
Ofurheili og krónískur þróari
Rauntímakort Strætó

Valur Þór Gunnarsson
Vöruþróunarstjóri veflausna
Samfélagsgúrú í Íslandsbanka