Advania opinberar dagskrá Haustráðstefnu Advania 2017

Gögn sem áhrifavaldar, staða sýndargjaldmiðla og tæknileg menntakerfi. Allt þetta og meira á Haustráðstefnunni, elstu tækniráðstefnu í Evrópu.

„Tækifæri í nýjum tækniheimi“ er yfirskrift Haustráðstefnu Advania sem haldin verður þann 8. september næstkomandi í Hörpu. Þar munu 34 fyrirlesarar stíga á svið og miðla reynslu sinni, sýn og þekkingu.

„Við erum afskaplega ánægð með dagskrána og gæði fyrirlesaranna sem munu flytja erindi á Haustráðstefnunni í ár“ segir Ægir Már Þórisson, forstjóri Adania á Íslandi. „Framtíðin er vinsælt umræðuefni á ráðstefnum sem þessari en við viljum skoða nánar tækifærin sem nýr tækniheimur hefur nú þegar fært okkur.“

Á ráðstefnunni verða erindi frá fyrirtækjum og stofnunum á borð við Google, Dell, Cambridge Analytica, HPE, RSA, Trend Micro, BitFury, Íslandsbanka, Arion banka, Össur og fleirum.

Boðið verður upp á fjölbreytt erindi sem skipt er niður á fjórar þemalínur: Tækni og öryggi, Nýsköpun, Stjórnun og Breakout. Á ráðstefnunni verða fimm lykilfyrirlesarar sem munu flytja erindi í hinum mikilfenglega Eldborgarsal en þeirra á meðal er Alexander Nix, forstjóri Cambridge Analytica, fyrirtækis sem spilaði lykilhlutverk í síðustu forsetakosningum í Bandaríkjunum sem og kosningunum um Brexit í Bretlandi. 

„Cambridge Analytica hefur þróað aðferðafræði og tækni sem gerir þeim kleift að kortleggja hegðun, skoðanir og langanir neytenda“ segir Ægir. „Þessar upplýsingar notar fyrirtækið svo til að hafa áhrif á hegðun neytenda, en meðal skjólstæðinga fyrirtækisins er sjálfur Donald Trump, sem notaði sér þessa þjónustu í kosningabaráttu sinni.“

Alls hafa um 17 þúsund gestir sótt ráðstefnuna frá upphafi og nú undanfarin ár hafa ráðstefnugestir verið um og yfir eitt þúsund talsins á hverju ári. Alls hafa um 900 fyrirlestrar verið haldnir á þessum ráðstefnum en um er að ræða einn stærsta viðburð ársins í upplýsingatækni hér á landi og jafnframt eina elstu árlegu tækniráðstefnu í Evrópu.

Á ráðstefnunni verður glæsilegt sýningarsvæði þar sem leiðandi fyrirtæki í upplýsingatækni veita gestum tækifæri til að prófa eigin lausnir. Ráðstefnugestir hafa mikil tækifæri til tengslamyndunar á sýningarsvæðinu og í glæsilegu kokteilpartíi sem haldið verður í boði Dell eftir ráðstefnuna.

Haustráðstefna Advania fer fram í Hörpu þann 8. september 2017 en þetta er í 23. sinn sem Advania stendur fyrir ráðstefnunni. Núna er hægt að kaupa miða á forkaupsverði og sérstök kjör eru í boði fyrir þá sem kaupa fimm miða eða fleiri.

Smelltu hér til að skoða dagskrá Haustráðstefnu Advania 2017.