Sigurður Sæberg ráðinn til Advania

Advania hefur ráðið Sigurð Sæberg Þorsteinsson til að leiða vörustýringu á rekstrarlausnasviði fyrirtækisins.

Advania hefur ráðið Sigurð Sæberg Þorsteinsson til að leiða vörustýringu á rekstrarlausnasviði fyrirtækisins.  

Sigurður starfaði síðast sem sölu- og markaðsstjóri Þekkingar frá árinu 2013. Áður var hann viðskiptastjóri hjá Þekkingu, verkefnastjóri hjá Anza, forstöðumaður sölu- og markaðssviðs Líflands og deildarstjóri flugrekstrarsviðs Air Atlanta á Íslandi. Hann er með B.Sc. í viðskipta- og markaðsfræðum frá Auburn Montgomery háskólanum í Bandaríkjunum. 

„Þróun upplýsingatæknilausna er á blússandi hraðferð, og þá er ég ekki bara að tala um lausnirnar sjálfar heldur einnig hvernig viðskiptavinir nálgast þær. “ segir Ægir Már Þórisson, forstjóri Advania á Íslandi. „Væntingar neytenda aukast sífellt og því mikilvægt fyrir okkur að vinna stöðugt að því að laga vöru- og þjónustuframboð að kröfum þeirra. Þarna á Sigurður eftir að koma sterkur inn, enda með mikla reynslu úr heimi upplýsingatæknilausna og við fögnum því að fá hann til liðs við okkur.“

„Við stöndum á spennandi tímamótum hvað varðar afhendingu upplýsingatæknilausna“ segir Sigurður, sem hóf störf hjá fyrirtækinu í febrúar. „Advania er einstakt fyrirtæki á Íslandi sem státar af umfangsmiklu safni fjölbreyttra upplýsingatæknilausna og það verður skemmtilegt að koma að áframhaldandi uppbyggingu á vöru- og þjónustuframboði fyrirtækisins.“

Sigurður er kvæntur Tinnu Margréti Rögnvaldsdóttur, starfsmanni Global Quality hjá Actavis, og saman eiga þau þrjú börn.