Afkoma Advania á fyrstu sex mánuðum ársins 2013

Viðsnúningur í Noregi

Mikill viðsnúningur hefur orðið hjá Advania í Noregi eftir mjög erfiðan rekstur á síðasta ári. Hagnaður fyrir vexti, skatta og afskriftir (EBITDA) nam 469 milljónum króna á fyrri hluta ársins samanborið við 486 milljóna króna tap fyrir vexti, skatta og afskriftir á sama tímabili í fyrra. Umskiptin má m.a. rekja til 540 milljóna króna sölu á hugbúnaðarréttindum til stórs viðskiptavinar á tímabilinu, umfangsmikilla skipulagsbreytinga um síðustu áramót og hagræðingar í rekstri. 

Um 86% af veltu Advania á uppgjörstímabilinu myndaðist á Íslandi og í Svíþjóð. Reksturinn í þessum löndum hefur verið í góðu jafnvægi og veltuaukning stöðug. Þannig jókst veltan á Íslandi um 12% frá fyrri hluta árs 2012 og var 6.098 milljónir kr. Í Svíþjóð jókst veltan um 6,9% og var 5.692 milljónir kr. 

Gestur G. Gestsson, forstjóri Advania, segir afkomu Advania í Noregi hafa haft mun meiri áhrif á niðurstöður samstæðunnar en umfang starfseminnar gefur tilefni til.  „Rekstri í Noregi hefur verið snúið til betri vegar með markvissum aðgerðum. Jafnframt hefur hlutfall erlendra tekna af veltu á Íslandi vaxið talsvert á milli ára. Þetta skapar aukna breidd í tekjumynstri Advania á Íslandi. Í því felast tækifæri til vaxtar á þröngum heimamarkaði en rekstrarumhverfi í greininni hefur af ýmsum ástæðum verið erfitt á síðustu árum. Við getum því verið nokkuð sátt við afkomuna.“

Um Advania

Advania á Íslandi sinnir upplýsingatækni með samþættum heildarlausnum fyrir atvinnulífið og neytendur á sviði hug- og vélbúnaðar, rekur fjölbreytta hýsingu og gagnaver auk víðtækrar rekstrarþjónustu. Advania er samstarfsaðili fjölmargra alþjóðlegra fyrirtækja í upplýsingatækni. Þar má nefna Dell, Cisco, EMC, IBM, Microsoft, NCR, Oracle, SAP, Symantec, HP og Xerox.