Advania fær gullvottun frá Cisco

Advania hefur hlotið gullvottun frá Cisco sem tryggir viðskiptavinum fyrirtækisins bestu mögulegu kjör á búnaði frá Cisco.

Vottunin er ein sú eftirsóttasta í upplýsingatæknigeiranum enda er Cisco leiðandi á heimsvísu í upplýsingatækni sem knýr áfram internetið.

Advania bætist því í þröngan hóp fyrirtækja sem veitt geta framúrskarandi ráðgjöf og þjónustu á sviði Cisco net- og öryggislausna. Vottunin byggir á umfangsmikilli úttekt á þjónustu- og rekstrarferlum Advania en miklar kröfur eru gerðar um sértæka þekkingu og reynslu ráðgjafa fyrirtækisins.

„Þetta er mikið fagnaðarefni fyrir okkar viðskiptavini og staðfesting á getu Advania til að veita afar sérhæfða þjónustu um mikilvægar lausnir Cisco. Fyrirtækið hefur verið meðal lykilsamstarfsaðila Advania um áratuga skeið og ég er stoltur af því markmiði sem náðst hefur með gullvottuninni,” segir Ægir Már Þórisson forstjóri Advania.

„Við höfum átt langt og gott samstarf við Advania og það er ánægjulegt að veita fyrirtækinu gullvottun sem staðfestingu á sérþekkingu starfsfólksins og hæfni í að veita framúrskarandi þjónustu,” segir Trine Strømsnes framkvæmdastjóri Cisco í Noregi og á Íslandi.

Myndatexti: Stefán Gudjohnsen framkvæmdastjóri Cisco á Íslandi afhenti Ægi Má Þórissyni forstjóra Advania gullvottun Cisco á dögunum.