Nýjasta nýtt - 26.03.2012
ÁTVR semur við Advania
Samingur um endurnýjun á kassakerfi, Microsoft Dynamics NAV og heildarþjónustu í hýsingu og rekstri.
Áhersla á hagkvæmni og öryggi
ÁTVR hefur að undangengnu útboði samið við Advania um endurnýjun á kassakerfi í öllum Vínbúðunum, en þær eru tæplega 50 talsins. Samhliða hefur ÁTVR undirritað samning við Advania um endurnýjun á fjárhagslausninni Microsoft Dynamics NAV, ásamt heildarþjónustu í hýsingu og rekstri á fjárhagslausninni. Við undirbúning samstarfsins var lögð þung áhersla á hagkvæmni og öryggi hlutaðeigandi lausna.
"Við hjá ÁTVR höfum langa reynslu af samstarfi við Advania á sviði upplýsingatækni, meðal annars þegar kemur að hugbúnaði og rekstri. Advania er sömuleiðis leiðandi aðili í hýsingu og rekstri kassakerfa og tengdra hugbúnaðarlausna. Endurnýjun sem þessi er stórt verkefni og að þessu sinni var gengið mjög langt í mannauðsmálum hvað snertir mikilvægar umbætur á vinnuumverfi starfsfólks Vínbúðanna. Undirbúningurinn gekk vel, innleiðingin er langt komin og niðurstaðan lofar góðu,“ segir Sveinn Víkingur Árnason, framkvæmdastjóri rekstrarsviðs ÁTVR.
„Það er sérstakt ánægjuefni þegar þjónustufyrirtæki í fremstu röð koma til okkar í viðskipti. Advania hefur um langt árabil fjárfest markvisst í aðstöðu, búnaði og þekkingu á sviði kassakerfa, viðskiptalausna, hýsingar og rekstrarþjónustu. Samningurinn við ÁTVR er gott dæmi um að viðskiptavinir okkar kunna vel að meta þessa uppbyggingu og þá þekkingu sem Advania hefur innanborðs,“ segir Gestur G. Gestsson, forstjóri Advania.