Advania sér um upplýsingatæknina fyrir Akureyrarbæ
Akureyrarbær og Advania hafa undirritað samning um að Advania taki að sér rekstur og framþróun á upplýsingatæknikerfum bæjarins og stofnana hans til næstu fimm ára.
Kerfi bæjarins verða hýst í hýsingarsal Advania á Akureyri en alls starfa 35 manns hjá Advania á Akureyri. Verkefnið rennir því frekari stoðum undir starfsemi Advania í höfuðstað Norðurlands. Samningurinn felur í sér að Advania tekur að sér rekstur og hýsingu á miðlægum kerfum, ásamt því að sjá um gagnageymslur bæjarins, gagnaafritun, eftirlit með kerfum, netsamband og Internetþjónustu. Jafnframt mun Advania þjónusta 1.200 starfsmenn bæjarins við tölvunotkun þeirra.
„Akureyrarbær hefur keypt hýsingu fyrir tölvukerfi sín síðan 2001 með góðum árangri. Advania verður fjórða fyrirtækið til að taka að sér hýsinguna og reksturinn. Við höfum átt ágæt samskipti við Advania á þessum tíma varðandi kaup á tölvubúnaði og erum bjartsýn á að fyrirtækið muni veita okkur góða þjónustu áfram. Upplýsingakerfi verða æ mikilvægari fyrir sveitarfélög eins og aðra með hverju árinu sem líður og þess vegna er mikið undir því komið að samstarfið við Advania gangi vel“ segir Eiríkur Björn Björgvinsson bæjarstjóri á Akureyri.
Á meðal þeirra upplýsingakerfa sem starfsmenn bæjarins nýta sér í daglegum störfum eru SAP bókhaldskerfi, One skjalakerfi og mannauðskerfið Vinnustund. Allar stofnanir bæjarins tengjast inn á miðlægt umhverfi Akureyrarbæjar sem hýst verður hjá Advania.
„Rekstur Akureyrarbæjar er spennandi verkefni sem við hjá Advania hlökkum til að takast á við í samstarfi við starfsmenn bæjarins. Við nýtum stærðarhagkvæmni í rekstri okkar og getum því boðið þjónustu og lausnir á mjög samkeppnishæfu verði. Við sjáum mikla möguleika á að bærinn geti náð hagræði í rekstri og bætt sína þjónustu við íbúa með upplýsingatækni,“ segir Eyjólfur Magnús Kristinsson framkvæmdastjóri rekstrarlausna Advania.