Aukin þjónusta á sviði kerfisrekstrar á Norðurlandi

Aron Örn Sigurðsson hefur verið ráðinn til Advania á Sauðárkróki. Hann mun sjá um rekstur tölvukerfa og notendaþjónustu á svæðinu.

Aron Örn Sigurðsson hefur verið ráðinn til Advania á Sauðárkróki. Hann mun sjá um rekstur tölvukerfa og notendaþjónustu á svæðinu.

Ráðning Arons þýðir að Advania á Sauðárkróki getur nú veitt fyrirtækjum á Norðurlandi umfangsmeiri þjónustu en áður. Hingað til hafa verkefnin að mestu tengst viðskipta- og bókhaldskerfinu NAV en með komu Arons eykst fjölbreytileiki þeirra til muna. Nú getur Advania á Sauðárkróki til að mynda séð um hönnun og rekstur flókinna UT-kerfa og veitt fyrirtækjum á svæðinu útstöðvaþjónustu. 

Aron er uppalinn á Sauðárkróki og þekkir vel til í sveitarfélaginu. Hann hefur starfað samfleytt við kerfisrekstur undanfarin níu ár en áður starfaði hann í vettvangsþjónustu hjá Símanum. Aron býr yfir mikilli reynslu af rekstri skýjalausna og hefur mikinn áhuga á notkun sjálfvirknivæðingarlausna. „Ég hef sérstakt dálæti á að nýta sjálfvirkni til að einfalda störf, t.d. með aðstoð Powershell,“ segir hann aðspurður. Hann bætist nú í hóp öflugra starfsmanna Advania og er þegar farinn að starfa að verkefnum sem tengjast Heilbrigðisstofnun Norðurlands. 

Hann telur mikil verðmæti felast í því að fyrirtæki á svæðinu hafi greiðan aðgang að sérhæfðri þekkingu. „Við sinnum fjölmörgum verkefnum í fjarþjónustu en það er alltaf gott að geta leitað til sérfræðinga á staðnum. Þannig getum við gert þjónustuna persónulegri og árangursíkari,“ segir Aron. Hann segist sjá mikil tækifæri í UT-rekstri á norðvesturhorninu. „Hér er fjöldinn allur af flottum fyrirtækjum sem ég hlakka til að kynnast betur og veita framúrskarandi þjónustu."