Nýjasta nýtt - 14.11.2013
Fjármálaráðherra flytur lykilræðu á Oracle notendaráðstefnu Advania
Bjarni Benediktsson fjármálaráðherra flytur lykilræðu á Oracle notendaráðstefnu sem Advania heldur á Hilton Nordica hóteli föstudaginn 15. nóvember.
Fjármálaráðherra flytur lykilræðu
Bjarni Benediktsson fjármálaráðherra flytur lykilræðu á Oracle notendaráðstefnu sem Advania heldur á Hilton Nordica hóteli föstudaginn 15. nóvember. Yfirskrift fyrirlesturs ráðherra er „Rafræn stjórnsýsla og hagnýting upplýsingatækni.“og hefst ræða hans kl. 08:50 í aðalráðstefnusal hótelsins. Annars hefst ráðstefnan hefst kl. 08:30 með setningarræðu Gests G. Gestssonar forstjóra Advania, og lýkur kl. 17. Þetta er annað árið í röð sem Oracle notendaráðstefna er haldin eftir nokkuð hlé en í fyrra sóttu um 500 manns ráðstefnuna. Búast má við svipuðum fjölda þátttakenda í ár en alls eru Oracle notendur um 20 þúsund talsins um land allt.
Ráðstefna sérsniðin að þörfum notenda
Notendaráðstefnan er sérsniðin til að mæta þörfum Oracle notenda í daglegum verkefnum, aðstoða þá við að læra betur á kerfið og auka notagildi þess. Á dagskrá hennar eru 26 fyrirlestrar og eru fyrirlesarar fjölbreyttur hópur innlendra og erlendra starfsmanna Fjársýslu Ríksins, Oracle, Advania, Alcoa Fjarðarál, National Oilwell Varco og Landsspítala háskólasjúkrahúsi. Þeir fjalla um nýjustu strauma og stefnur í Oracle lausnum. Reynslusögur og hagnýtar upplýsingar eiga stóran sess á ráðstefnunni.
Um Oracle
Oracle kerfið er viðskiptahugbúnaður sem felur í sér heildarlausn fyrir fyrirtæki og stofnanir. Kerfið samanstendur af rúmlega 60 kerfishlutum þar á meðal öflugu mannauðskerfi, fjárhagsbókhaldi, verkbókhaldi, innkaupakerfi og eignastýringarkerfi. Advania er viðurkenndur samstarfsaðili Oracle, Oracle Platinum Partner. Þeir íslensku aðilar sem nýta Oracle lausnir eru Fjársýsla ríkisins sem hagnýtir fjárhags- og mannauðskerfi ríkisins (Orra) en Reykjavíkurborg, Seðlabankinn og Alcoa Fjarðarál nota Oracle mannauðs- og launakerfi.
Um Advania
Advania er stærsta upplýsingatæknifyrirtæki landsins og starfa þar um 1.100 starfsmenn: 600 hér á landi og 500 til viðbótar í Noregi og Svíþjóð. Advania býður fjölbreyttar lausnir og þjónustu, sem spanna upplýsingatækni frá A til Ö. Starfsemi fyrirtækisins er vottuð samkvæmt alþjóðlegu gæða- og öryggisstöðlunum ISO 9001 og ISO 27001.