Ný vefverslun Ölgerðarinnar er í anda annarrar kynslóðar vefverslana, gagnadrifin og veitir viðskiptavinum betri yfirsýn. Vefverslunin er með þeim umfangsmeiri sem Advania hefur smíðað.

Ný vefverslun Ölgerðarinnar er í anda annarrar kynslóðar vefverslana, gagnadrifin og veitir viðskiptavinum betri yfirsýn. Vefverslunin er með þeim umfangsmeiri sem Advania hefur smíðað.

Megináhersla Ölgerðarinnar er á drykkjarvörur. Í nýrri vefverslun fyrirtækisins geta viðskiptavinir afgreitt sig sjálfir hvenær sem þeim hentar með allt frá tei til sterks áfengis. Verslunin er fyrst og fremst hugsuð sem reikningsviðskipti við veitingastaði, bari, hótel og aðra rekstraraðila. Í vefversluninni sjá viðskiptavinir kaup sín og kjör, reikningsstöðu og geta sótt allar viðskiptaupplýsingar sem þeir þurfa fyrir sinn rekstur.

Vefverslunin er með þeim stærri sem Advania hefur smíðað. Hún er í Dynamic Web umhverfinu og er samþætt við fjárhagskerfið AX. Allir ferlar voru uppfærðir svo birgðastaðan í nýju vefversluninni sé ávallt rétt. 

„Í gamla kerfinu okkar var möguleiki á að upplýsingar úreldust á vefnum og þá lenti viðskiptavinurinn í því að vörurnar sem hann vildi panta voru kannski ekki til á lager. Nú höfum við tengt öll kerfin saman og sækjum gögn frá einum stað sem veitir okkur betri yfirsýn. Við höfum einnig öflugri greiningartól og getum því veitt viðskiptavinum persónulegri þjónustu,“ segir Sæmundur Mariel Gunnarsson vefverslunarstjóri Ölgerðarinnar.

Hann segir DynamicWeb hafa hentað vel fyrir vefverslunina. „Við vildum fara í öflugra kerfi sem væri skalanlegt að þeirri vaxandi umferð sem fer í gegnum verslunina. Við erum að stíga okkar fyrstu skref í þessu kerfi og sjáum fram á að geta gert ýmislegt í því sem við gátum ekki áður. Til dæmis er tilboðsvirkni nú auðveldari og greiðslumöguleikar verða fleiri,“ segir Sæmundur.

Bríet Pálsdóttir, deildarstjóri vefverslana hjá Advania, segir nýjar vefverslanir vera gagnadrifnar og sýni öll gögn í rauntíma. Í þeim megi greina hvaðan umferðin kemur, kortleggja verslunarferil viðskiptavina og flokka vöruframboðið á einfaldan hátt.

„Vefverslun Ölgerðarinnar er gott dæmi um það sem við köllum aðra kynslóð vefverslana. Þar er meiri stuðningur við vörusölu og markaðseftirfylgni. Vefkerfi, vefverslun, vörustýring og markaðstól spilar saman og vefstrúktúrinn er alltaf miðaður að viðskiptavininum. Ölgerðin notar nú PIM-hluta DynamicWeb þar sem er vörustýringartól og gerir þeim kleift með einföldum hætti að flokka vöruframboðið og filtera eftir þörfum viðskiptavina. PIM auðveldar starfsmönnum Ölgerðarinnar að fylgja vörunum þeirra eftir með góðri yfirsýn frá ólíkum sjónarhornum. Hægt að vera með ýmsa vinnulista út frá gildum sem varan þarf að hafa. Til dæmis lista yfir vörur sem ekki hafa verið yfirfarnar í ákveðinn tíma, vantar lýsingu á og svo framvegis,“ segir Bríet.