SAP velur Skýrr samstarfsaðila ársins

SAP hefur valið Skýrr samstarfsaðila ársins í BusinessObjects-viðskiptagreindarlausnum

SAP hefur valið Skýrr sem samstarfsaðila ársins í BusinessObjects-viðskiptagreindarlausnum á markaðssvæði sem telur Ísland og Danmörku.

Skýrr atti kappi við liðlega sextíu fyrirtæki í þessum flokki, jafnt á Íslandi sem í Danmörku. Verðlaunin voru veitt í Kaupmannahöfn fyrir skemmstu á árlegum fundi samstarfsaðila SAP í BusinessObjects.

Í umsögn SAP fékk Skýrr sérstaka viðurkenningu fyrir öfluga starfsemi og þjónustu í mjög erfiðu viðskiptaumhverfi. Skýrr var talið meðal einbeittustu samstarfsaðila SAP á þessu sviði með mjög skýr markmið og góðan árangur í innleiðingum hjá viðskiptavinum. Þess má geta að Skýrr var sömuleiðis söluhæsti samstarfsaðili SAP í viðskiptagreindarlausnum BusinessObjects á Íslandi og í Danmörku árið 2010.

Viðskiptagreind í hnotskurn

Viðskiptagreind snýst um að breyta gögnum í verðmætar upplýsingar. Þessar upplýsingar nýtast svo sem grundvöllur ákvarðanatöku stjórnenda fyrirtækja eða annarra starfsmanna. Lausnir frá SAP BusinessObjects mynda heildstætt umhverfi fyrir viðskiptagreind, allt frá samhæfingu gagna til áætlanagerðar og mælaborðs fyrir stjórnendur.

Skýrr hefur þjónustað SAP BusinessObjects frá árinu 1997 og viðskiptavinir koma úr öllum greinum atvinnulífsins. Viðskiptagreindarhópur Skýrr er skipaður öflugum hópi sérfræðinga sem veita ráðgjöf við stefnumótun og markmiðasetningu varðandi vöruhús gagna, gagnahreinsun, samþættingu, birtingu gagna, rekstur viðskiptagreindarumhverfis og fleira. Forstöðumaður viðskiptagreindar hjá Skýrr er Sigríður Þórðardóttir, en söluráðgjafi er Sturla Sigurðsson.

Um Skýrr

Skýrr er stærsta upplýsingatæknifyrirtæki Íslands með tæplega 1.100 starfsmenn í fjórum löndum. Skýrr veitir atvinnulífinu heildarlausnir í hugbúnaði, vélbúnaði og rekstrarþjónustu. Viðskiptavinir Skýrr á fyrirtækjamarkaði eru yfir 10 þúsund talsins og fyrirtækið hefur um þriðjungs markaðshlutdeild á neytendamarkaði. Meðal samstarfsaðila Skýrr í þekkingariðnaði eru alþjóðlegu upplýsingatæknirisarnir Dell, EMC, Microsoft, Oracle, SAP og VeriSign. Forstjóri Skýrr er Gestur G. Gestsson.