Sía tekur við keflinu af Heimi Fannari Gunnlaugssyni sem lætur af störfum hjá Advania. Hún hefur rúmlega tveggja áratuga reynslu úr upplýsingatæknigeiranum og hefur starfað hjá Advania og forverum þess í 14 ár. Nú síðast gegndi hún starfi forstöðumanns á viðskiptalausnasviði. Sía er með BS-próf í upplýsingakerfum frá Háskólanum í Skövde og lauk nýlega MBA-gráðu frá AVT Business School í Kaupmannahöfn.

„Ég er mjög ánægð með að vera treyst til að leiða þetta öfluga teymi sérfræðinga. Með frábærum samstarfsaðilum okkar höldum við áfram að aðstoða fyrirtæki upp í skýið, auka skilvirkni þeirra og gera stjórnendum kleift að taka gagnadrifnar ákvarðanir. Það eru því spennandi tímar framundan hjá viðskiptavinum okkar,” segir Sía.

„Á undanförnum árum hefur Advania unnið frábært starf við að færa viðskiptavini inn í framtíðina með áherslu á skýið. Sía býr yfir mikilli þekkingu á þessu sviði og í hennar nýja hlutverki gefast enn fleiri tækifæri á að miðla reynslu hennar til okkar sérfræðinga og viðskiptavina. Heimi Fannari þakka ég gott samstarf og óska velfarnaðar á nýjum vettvangi,” segir Ægir Már Þórisson, forstjóri Advania.

Framkvæmdastjórn Advania skipa nú þau Sigurður Sæberg Þorsteinsson, Jón Brynjar Ólafsson, Sigríður Sía Þórðardóttir, Margrét Gunnlaugsdóttir, Sigrún Ámundadóttir, Hinrik Sigurður Jóhannesson, Hafsteinn Guðmundsson og Ægir Már Þórisson forstjóri fyrirtækisins.