ÍSÍ semur við Advania um hýsingu, rekstur og vefsvæði
ÍSÍ hefur samið við Advania um viðamikla rekstrarþjónustu og útvistun á sviði upplýsingatækni.
Íþrótta- og ólympíusamband Íslands (ÍSÍ) hefur samið við Advania um viðamikla rekstrarþjónustu og útvistun á sviði upplýsingatækni. Um er að ræða hýsingu og rekstur Advania á skrifstofukerfum ÍSÍ og fjölda aðildarfélaga sambandsins. Samhliða þessu hefur ÍSÍ samið við Advania um hönnun og hýsingu á nýju vefsvæði fyrir sambandið.
ÍSÍ þarf hagkvæmni og hátt þjónustustig
„ÍSÍ leggur mikið upp úr því að vanda til vals á samstarfsaðilum og birgjum í því skyni að tryggja hagkvæmni og hátt þjónustustig. Við gengum til samstarfs við Advania þar sem tilboð þeirra mætti þessu markmiðum okkar og náði til óvenju margra þátta í okkar upplýsingatækniumhverfi. Við væntum mikils af samstarfinu og ég er viss um að það verður farsælt,“ segir Ólafur Rafnsson, forseti ÍSÍ.
Framsækin og útsjónarsöm notkun á upplýsingatækni
„ÍSÍ er heildarsamtök íþróttahreyfingarinnar á Íslandi og svo umfangsmikið hlutverk kallar á framsækna og útsjónarsama notkun á upplýsingatækni. Advania hefur á undanförnum misserum þróað mjög öflugt lausnamengi á sviði rekstrarþjónustu og veflausna og við teljum þennan samning til marks um góða stöðu okkar í þeim efnum. ÍSÍ sýnir okkur mikið traust með svo viðamiklum samningi og það er tilhlökkunarefni að standa undir þeim væntingum," segir Gestur G. Gestsson, forstjóri Advania.