Skriffinska heyrir sögunni til við félagaskipti leikmanna í knattspyrnu eftir að nýtt stafrænt skiptikerfi var tekið í notkun af KSÍ í sumar. FIFA hefur einnig innleitt stafrænt auðkenni allra iðkenda, félaga og þjálfara sem gerir skipulagsmál í fótbolta talsvert auðveldari og nútímalegri.

Hingað til hafa félagaskipti leikmanna í knattspyrnu kallað á mikið pappírsumstang. Þurftu þá fulltrúar knattspyrnufélaga að senda blöð milli bæjarfélaga sem allir hlutaðeigandi þurftu að undirrita. Því næst tók við óskilvirkt og handvirkt ferli sem starfsfólk Knattspyrnusambands Íslands átti fullt í fangi með að sinna á meðan félagaskiptaglugginn stóð opinn. Undir lok gluggans kom það fyrir að um 200 beiðnir bárust á einum degi sem tók sinn tíma að afgreiða með þessum hætti.

Advania hefur aðstoðað KSÍ við að koma utanumhaldi um knattspyrnuhreyfinguna í stafræna heima. Í sumar var stórt skref stigið þegar félagaskiptin voru gerð stafræn. Ferlið er nú talsvert auðveldara og fer fram á innri vef KSÍ. Beiðni um skipti og samþykki þeirra er gerð á vefnum og þar er keppnisleyfi leikmanna einnig gefið út. Félagaskiptin eru því afgreidd á mun skemmri tíma en áður og án þess að fólk þurfi að sendast með blöð milli bæja.

Fleiri mikilvægir ferlar í fótboltaheiminum eru að verða stafrænir. Liður í því eru alþjóðleg stafræn auðkenni sem FIFA hefur farið fram á að öll aðildarlöndin noti. Hver leikmaður, þjálfari, félag og völlur hefur þá sína auðkennandi tölu sem skráð er í eina miðlæga lausn. Að undanförnu hafa Advania og KSÍ unnið að tengja auðkennið við gagnagrunn KSÍ svo hægt sé að sækja upplýsingar til dæmis um feril leikmanna og uppeldisfélög.

Auðkennið er hugsað til að gera skráningar nákvæmari en áður og auðvelda alþjóðleg og stafræn samskipti í hreyfingunni. FIFA-auðkenni leikmanna er notað til dæmis við félagaskipti.