Raad Bestouh ferðast á rafmagnshjóli til og frá vinnu og kemur við í æfingasal Advania eftir hjólatúrinn á morgnanna.

Raad Bestouh ferðast á rafmagnshjóli til og frá vinnu og kemur við í æfingasal Advania eftir hjólatúrinn á morgnanna.

„Ég hjóla nánast daglega yfir sumarmánuðina. Ég bý í Garðabæ og fer um það bil tíu kílómetra vegalengd á hjólinu í vinnuna. Oftast legg ég snemma af stað og er mættur uppúr átta. Þá nota ég tækifærið og fer í æfingasalinn í 10-15 mín, geri nokkrar æfingar eða geng á hlaupabrettinu í smá stund. Í vinnunni er góð búningsaðstaða sem ég nýti mér til að gera mig til fyrir vinnudaginn. Svo fæ ég mér hafragraut hússins áður en ég byrja að vinna klukkan níu. Þetta er mjög góð rútína og mér finnst gott að geta gert þetta allt á sama stað,“ segir Raad.

Hann segist síður vilja hjóla í snjó og hálku á veturna en á sumrin velji hann alltaf hjólið sem fyrsta kost. Ekki alls fyrir löngu keypti hann sér rafmagnshjól í IKEA sem gerir hjólaferðina ögn þægilegri. „Hleðslan dugar í svona tvo daga og ef hún klárast þá hjóla ég bara á gamla mátann. Þetta er mjög sniðugt hjól á sanngjörnu verði. Ég finn hvað hjólreiðarnar gera mér gott, bæði fyrir sál og líkama. Mér líður mjög vel af þessu.“

Helmingur starfsmanna Advania nýtir aðra ferðamáta en einkabíl til og frá vinnu, samkvæmt nýlegri starfsmannakönnun.

Mynd: Raad hjólar í vinnuna á sumrin og kemur við í æfingaaðstöðu Advania áður en hann byrjar vinnudaginn.