5.7.2021 | Fréttir

Stærsta jarðhitaráðstefna heims á Íslandi

advania colors line
Hildigunnur H Thorsteinsson og Bjarni Pálsson

World Geothermal Congress, WGC, er stærsta jarðhitaráðstefna í heimi og er haldin af International Geothermal Association. Ráðstefnan fer í ár bæði fram í Hörpu og á netinu með viðburðalausn Advania.

Er þetta umfangsmesta stafræna verkefni sem Harpa hefur tekið þátt í og langstærsta ráðstefna sem haldin hefur verið með stafrænni lausn Advania. „Þetta er búið að vera í undirbúningi núna í mörg ár, alveg frá árinu 2013 og átti að halda í apríl í fyrra en vegna aðstæðna höfum við þurft að breyta forminu þannig að við erum í rauninni að halda röð vefviðburða sem eru í beinni útsendingu frá Hörpu og síðan ætlum við að enda þetta með glæsilegri ráðstefnu í hörpu í október,“ segir Bjarni Pálsson, formaður skipulagsnefndar WGC.

Fjallað var um ráðstefnuna í Morgunblaðinu í dag. 


Á ráðstefnunni er fjallað um nýjustu strauma í jarðhitanýtingu svo sem fjölnýtingu jarðhita, matvælaframleiðslu, heilsuferðamennsku og ýmiss konar iðnað sem byggir á affalli frá jarðhitaorkuverum. Jarðhitasérfræðingar frá um 70 löndum deila þekkingu sinni og kynnt verða rúmlega 2.000 rannsóknarverkefni. Rafrænir viðburðir ráðstefnunnar hafa verið haldnir einu sinni í mánuði síðan í mars og næsti viðburður er á morgun og ber hann heitið Cutting edge.“ Viðburðurinn byrjar klukkan átta í fyrramálið og stendur yfir í 18 klukkustundir svo öll lönd heims hafi hluta af dagskránni á dagvinnutíma. Að sögn Bjarna verður sérstaklega fjallað um fjölnýtingu og hvað sé hægt að gera annað en hitaveituvatn úr jarðhita. Þá nefnir Bjarni að til að mynda verði fjallað um líftæknilyf og húðvörur.

Alls kyns nýsköpun

„Jarðhiti er náttúrulega eitt af þeim fögum þar sem Ísland er algjörlega í fararbroddi í heiminum svo það vilja margir koma til Íslands og sjá hvað við höfum verið að gera. Við erum með heitan jarðhita, raforkuvinnslur og hitaveitur alveg á heimsmælikvarða en svo höfum við líka verið að fást við alls kyns nýsköpun í kringum jarðhitanýtinguna svo við höfum frá ótrúlega miklu að segja. Þótt við séum ekki fjölmennt land þá höfum við prófað svo margt.“


TIL BAKA Í EFNISVEITU