Hvað skal hafa í huga þegar tölvuskjár er keyptur?
Að vera með lélegan skjá við góða tölvu er svipað að eiga nýjan og fínan bíl en keyra hann á gömlum og slitnum dekkjum.
Af hverju skiptir máli að vera með rétta skjáinn?
Að vera með rétta skjáupplausn fyrir þau verkefni sem þú ert að vinna í á hverjum tíma sparar tíma og fyrirhöfn. Þá er nægt vinnuplás á skjánum þannig að skrun stórminnkar eða heyrir sögunni til. Þegar þú velur skjá margborgar sig að vera með á hreinu í hvað þú ætlar að nota hann helst. Það er glettilega mikill munur á skjám sem eru ætlaðir til heimilsnota, skrifstofuvinnu eða í grafíska vinnslu.
Skjáir fyrir heimilið
Skjáir fyrir heimilið eru gjarnan með glerfilmu sem gera myndir meira lifandi og bjartari. Slíkt hentar ekki ef verið er að vinna myndir til prentunar þar sem litir á skjám með glerfilmu skila öðruvísi litum en á prenti. Skjáir með glerfilmu henta ekki þar sem gluggar eru fyrir aftan notandann sem er algengt á skrifstofum. Snertiskjáir eru spennandi kostur fyrir þá sem nota Windows 8 stýrikerfið og fela í sér nýja upplifun við að skoða vefsíður, spila leiki og skoða myndir.
Skjáir fyrir fyrirtæki
Með sífellt minni og nettari fartölvum og notkun spjaldtölva á vinnustöðum er í raun meiri þörf fyrir stóra og myndarlega skjái. Vinnuvistfræði er mikilvæg enda verjum við oft löngum tíma fyrir framan tölvuskjái í vinnunni. Vinnuaðstaða skiptir sköpum í heilsu og framleiðni starfsmanna. Á vinnustöðum er gott að hafa skjái sem auðvelt er að stilla að þörfum notandans. Nauðsynlegt er að hafa skjá með glampavörn og gott er að geta breytt hæð og sjónarhorni eftir því hvort horft er á skjáinn í skammsniði (e. Portrait) eða langsniði (e. Landscape).
Skjáir fyrir grafíska vinnslu
Þeir sem kaupa skjái fyrir grafíska vinnslu ættu að velja þá með vandaðri IPS skjámottu (e. Display panel) en þeir eru með hærri upplausn en venjulegir skjáir sem ætlaðir til heimanota eða til notkunar á vinnustöðum. Skjáir í Ultrasharp línunni frá Dell eru dæmi um skjái sem ætlaðir eru fyrir grafíska vinnslu og henta sérstaklega vel fyrir vinnslu á kyrrmyndum og hreyfimyndum. Þeir sem starfa í prentiðnaðinum ættu að skoða skjái með svokallaðri „Premiercolor“ tækni sem skilar hárnákvæmum litum.
Ef þú velkist í vafa um hvernig skjár hentar þér þá endilega kíktu í verslanir Advania og fáðu ráðleggingar.