Bragi Gunnlaugsson
Vefstjóri Advania

Við höfum öll okkar mismunandi stiku sem segir okkur hvenær haustið er byrjað. Hjá sumum er það litabreytingar á gróðrinum og kannski þegar berin láta sjá sig. Hjá öðrum er það fyrsta haustlægðin sem rekur öll garðhúsgögn og trampólín skyndilega aftur í vetrarhýðið.

Hjá okkur í Advania er það hinsvegar veislan, hátíðin og samhristingurinn sem við köllum Haustráðstefnuna.

Í ár er ráðstefnan haldin í 29. sinn og við erum ófeimin að segja að hún hefur sjaldan eða aldrei verið jafn glæsileg. Listinn yfir fyrirlesara er langur og glæsilegur - ef ég færi að telja þá alla upp myndum við sitja hér saman í klukkutíma. Ég hvet þig til að skoða dagskrána og sjá fjölbreytileikann. Við munum heyra um allt frá gagnagreiningu í Ísfólkinu til þess hvernig netglæpir og viðskipti með persónugögn eru orðin að heljarinnar bransa. Ef þú finnur ekki eitthvað sem þú hefur áhuga á skal ég éta hattinn minn.

Á Haustráðstefnunni 2023 ætlum við að prufa nokkuð magnað: að bjóða upp á tvær útgáfur af ráðstefnunni sem gestir geta valið um. Eina af gamla skólanum í raunheimum, og aðra í netheimum í opinni dagskrá. Bókstaflega það besta úr báðum heimum!

Svo. Hvað þarf að hafa í huga til að fá sem mest úr ráðstefnunni?

• Fyrst og fremst er auðvitað að skrá sig. Online skráning veitir þér aðgang að beinu útsendingunni og upptökum af öllum erindum að ráðstefnu lokinni. Premium skráning bætir ofan á það miða á Premium dagskrána í Hörpu 7. september. Sú dagskrá er ekki send út í beinni.
• Settu saman þína dagskrá með því að smella á hjartað á fyrirlestrarspjaldinu. Þú getur alltaf nálgast þína dagskrá í valmyndinni efst á síðunni.

• Ráðstefnan hefst af krafti kl 11:00 og það eru sannkallaðar kanónur sem ætla að fylgja okkur úr höfn. Gefðu þér því nægan tíma til að ná í ráðstefnupassann þinn og kannski einn kaffibolla áður en þú sest inn í Silfurberg. Ég mæli með að vera komin í síðasta lagi 10:30
• Á slaginu tólf er hádegismatur og þá er gráupplagt að blanda geði við aðra ráðstefnugesti. Þetta er sérstaklega gott tækifæri til að hressa upp á tengslin eftir sumarið.
• Samstarfsaðilar okkar verða á svæðinu að kynna spennandi lausnir. Ekki gleyma að kíkja á básana og taka spjallið. Það er aldrei að vita nema þú vinnir glæsileg verðlaun!
• Að ráðstefnu lokinni er boðið upp á kokteil. Þar er ekki bara gott að hitta aðra rástefnugesti, heldur einnig einstakt tækifæri til að hitta á fyrirlesarana. Það er því ekkert vitlaust að staldra aðeins við eftir síðasta erindið.

• Það sakar ekki að skrá sig inn á ráðstefnuvefinn nokkrum mínútum áður en útsending hefst. Við lofum frábærri biðtónlist!
• Ráðstefnuvefurinn virkar vitaskuld í öllum vöfrum og í öllum snjalltækjum. Mér finnst persónulega gamla góða tölvan klikka seint til að fá bestu upplifunina.
• Ekki hafa áhyggjur þó þú missir af einhverju. Þetta verður allt aðgengilegt á vefnum eftir ráðstefnu.

Að fylgjast með á vefnum er auðvitað frítt og öllum opið. Premium miðar eru enn til þegar þessi orð eru skrifuð, en fara hratt! Ég hvet þig til að skrá þig og taka þátt í veislunni - þú vilt ekki missa af þessu.