Umfang Advania tvöfaldast
Advania stefnir á að verða eitt stærsta upplýsingatæknifyrirtæki í Norður-Evrópu og hefur fest kaup á norræna fyrirtækinu Visolit.
Advania stefnir á að verða eitt stærsta upplýsingatæknifyrirtæki í Norður-Evrópu og hefur fest kaup á norræna fyrirtækinu Visolit.
Með samruna Advania og Visolit verður fyrirtækið með um 2400 starfsmenn og 130 milljarða króna veltu. Sameinaðir kraftar svo fjölmenns hóps sérfræðinga gerir fyrirtækinu kleift að bjóða framúrskarandi þjónustu og ráðgjöf um upplýsingatækni, sérsniðna að hverjum viðskiptavini.
Visolit er leiðandi á sviði upplýsingatækni og skýjalausna á fyrirtækjamarkaði í Noregi og Svíþjóð. Það er svipað að stærð og Advania-samsteypan, með um 1200 starfsmenn og starfsstöðvar í Noregi og Svíþjóð. Með kaupum á Visolit tvöfaldast því starfsmannafjöldi Advania. Stefnt er á áframhaldandi öran vöxt.
Markmið Advania er eftir sem áður að vera traustur samstarfsaðili fyrirtækja um upplýsingatækni og gera þau í stakk búin til að mæta áskorunum framtíðarinnar með stafrænum lausnum.
Advania vill áfram vera framúrskarandi vinnustaður og laða til sín hæfileikaríkt fólk með ólíka þekkingu og reynslu. Fyrirtækinu verður dreifstýrt til að tryggja þekkingu á þörfum viðskiptavina í hverju landi.
„Við erum full tilhlökkunar að sameinast Visolit og verða þannig enn öflugra upplýsingatæknifyrirtæki á Norðurlöndunum. Með því að sameina krafta okkar getum við boðið viðskiptavinahópi okkar beggja breiðari og betri þjónustu,“ segir Mikael Noaksson, forstjóri Advania á Norðurlöndunum.
„Við erum stolt af uppbyggingu okkar á Visolit siðan 1997 og þeirri stöðu sem við höfum náð í Noregi og Svíþjóð. Með sameiningu við Advania hefjum við nýja og spennandi vegferð á norrænum markaði og getum gert enn betur við viðskiptavini okkar,” segir Terja Mjøs, forstjóri Visolit.
Advania hefur komist að samkomulagi við IK Investment Partners, um kaupin á Visolit, af IK VII Fund og öðrum hluthöfum.
Sjóðir í eigu Goldman Sachs og aðrir hluthafar Advania, auka hluti sína í hinu sameinaða norræna upplýsingatæknifyrirtæki. IK IX Fund kemur inn í hluthafahópinn.
Goldman Sachs Bank Europe SE, veitti Advania ráðgjöf í kaupferlinu. Raymond James var ráðgjafi Visolit.
Áætlað er að viðskiptin verði frágengin fyrir árslok 2021 en þau eru háð samþykki samkeppnisyfirvalda í Noregi og Svíþjóð.