Sascha Meier, Errol Norlum og Aurora Gaimon eru á meðal fyrirlesara Haustráðstefnunnar í Hörpu.
Fréttir - 25. ágúst 2025Framtíð gervigreindar tekin fyrir í Hörpu 4. september
Sylvía Rut Sigfúsdóttir
samskiptastjóri Advania
Haustráðstefna Advania fer fram 3. og 4. september. Fyrri ráðstefnudagurinn er á vefnum en seinni daginn fyllum við Silfurberg í Hörpu þar sem tuttugu fyrirlesarar stíga á svið.
Fyrir hádegi verður áherslan á gervigreind á ráðstefnunni en eftir hádegi færum við okkur yfir í netöryggi, nýsköpun og sjálfbærni.
Þessa dagana eru íslensk fyrirtæki að kortleggja stærri skref í gervigreindinni og því lá beint við að beina sviðsljósinu á þetta mikilvæga viðfangsefni á ráðstefnunni. Við fáum til landsins marga erlenda sérfræðinga á þessu sviði og verður farið yfir það sem er framundan ásamt því að skoða nánar helstu áskoranir og tækifæri.
Errol Norlum forstjóri og stofnandi The AI Framework í Svíþjóð er einn af aðalfyrirlesurum Haustráðstefnunnar í ár. Errol leiddi gervigreindarteymi H&M Group áður en hann stofnaði eigið fyrirtæki en hefur síðustu ár verið ráðgjafi fjölda fyrirtækja um alla Evrópu þegar kemur að innleiðingu gervigreindar til að ná meiri árangri. Eftir að Advania keypti The AI framwork í sumar hefur hann tekið að sér að leiða gervigreind innan Advania samstæðunnar. Hann hefur einstaka þekkingu og reynslu sem hann ætlar að deila með áhorfendum í Hörpu. Meðal annars fjallar hann um það hverni fyrirtæki geta haldið sínum fókus í þessari spennandi vegferð sem gervigreindin er.
Dirk Darfuss frá NVIDIA ætlar að veita innsýn í þróun gervigreindar. Hann fer einnig yfir það hvernig NVIDIA styður við að móta atvinnugreinar, hraða nýsköpun og breyta hagkerfum um allan heim.
Gervigreindarsérfræðingurinn Aurora Gaimon ætlar að fjalla um það sem gervigreindin krefst af okkur. Hvað þýðir það raunverulega fyrir fyrirtæki að verða tilbúin fyrir gervigreind. Sascha Meier frá Dell ætlar að tala um sviðsmyndina næstu fimm árin í gervigreind, ofurtölvur og vélmenni. Neil Sholay hefur síðustu ár leitt gervigreindarvegferð Oracle (Vice president of AI). Á ráðstefnunni ætlar meðal annars að fara yfir það hvernig hægt er að mæla áhrif gervigreindar á rekstur og hvernig fyrirtæki geta tryggt saumlausari innleiðingu gervigreindarinnar.
Fjárfestirinn Morten Johnstad-Møller ætlar svo að tala um það hvernig gervigreindin hefur algjörlega gjörbreytt því hvernig við vinnum og hvað það þýðir.