Sylvía Rut Sigfúsdóttir
samskiptastjóri Advania

Október er tileinkaður netöryggi víða um Evrópu. Öryggisoktóber, eða Evrópski netöryggismánuðurinn (European Cybersecurity Month), er haldinn ár hvert að frumkvæði Netöryggisstofnunar Evrópusambandsins (ENISA) og framkvæmdastjórnar ESB. Markmiðið er að efla vitund fyrirtækja, stofnana og almennings um netógnir og góðar öryggisvenjur. Í ár bjóðum við í Öryggisoktóber upp á veffundaröð þar sem fjallað er um netöryggisseiglu, gervigreind í árásum og vörnum og öryggi í Microsoft 365, meðal annars með reynslusögu frá Sjóvá.

Allir fundirnir eru sýndir á vefnum okkar og dagsetningarnar eru 20. október, 22. október, 27. október og 29. október. Fundirnir hefjast slaginu kl. 10:00 og skráning er ókeypis og öllum opin.

Netöryggisseigla var meðal lykilviðfangsefna Haustráðstefnu Advania í september, þar sem Guðmundur Arnar Sigmundsson, netöryggis- og gagnaþróunarstjóri Advania, lokaði dagskránni. Við fylgjum því eftir þriðjudaginn 20. október og köfum dýpra.

Netógnir þróast og breiðast út með ógnarhraða, og það gerir seiglu fyrirtækja mikilvægari en nokkru sinni fyrr. Seiglan snýst ekki bara um að verjast, heldur um að geta haldið starfseminni gangandi jafnvel þótt alvarleg atvik komi upp. Guðmundur Arnar fær til sín Gunnar Smára Agnarsson, ráðgjafa í netöryggi, og saman fara þeir yfir hvernig fyrirtæki byggja upp slíka seiglu.

Gervigreindin er að breyta veruleikanum í netöryggismálum. Sjálfstýrð gervigreind, svokallaðir agentar, er orðin öflugt árásartæki en nýtist líka í vörnum. Um leið skiptir stafrænt fullveldi sífellt meira máli til að tryggja mikilvæga innviði.

Fimmtudaginn 22. október fara Viðar Pétur Styrkársson, viðskiptastjóri Advania ALT, og Þórður Ingi Guðmundsson, forstöðumaður Gervigreindarseturs Advania, yfir þessa nýju víglínu.

Hvernig lítur vegferð að hærra Secure Score út í raun? Þriðjudaginn 27. október ræðir Einar Örn Einarsson, lausnaarkitekt hjá Advania, við Maurice Zschirp, rekstrarstjóra Sjóvár, sem fór markvisst í að styrkja Microsoft 365 umhverfi fyrirtækisins.

Þeir fara yfir upphafspunktinn, hvaða breytingar skiluðu mestum árangri og hvernig stjórnendur og notendur voru fengnir með. Heiðarlegt spjall um það sem gekk vel, það sem reyndist erfiðara og ráð til þeirra sem vilja hefja sína eigin öryggisvegferð.

Microsoft 365 Business Premium veitir traustan öryggisgrunn. Árásaraðilar hafa hins vegar þróast og gervigreindin eykur bæði hraða og fágun netárása.

Á lokafundinum, fimmtudaginn 29. október, fara Arnar Ágústsson, deildarstjóri rekstrarlausna hjá Advania, og Claus Madsen, kerfisverkfræðingur hjá Arrow, yfir hvers vegna lítil og meðalstór fyrirtæki eru orðin eftirsótt skotmörk og hvenær getur borgað sig að stíga skrefið upp í öflugri ógnarvarnir. Það sem ekki sést er ekki hægt að verja. Fundurinn fer fram á ensku undir heitinu Beyond Business Premium: Is your Security ready for the AI era.